కావలసిన పదార్థాలు
సేమ్యా : పావు కిలో
నిమ్మకాయలు : 2 పెద్దవి
పచ్చిమిరపకాయలు : 4 నిలువుగా చీల్చకోవాలి
వేరుశెనగ గుండ్లు : 50 గ్రాములు
కరివేపాకు : 4 రెబ్బలు
పోపుదినుసులు : కొద్దిగా
ఎండుమిర్చి : 2
ఇంగువ : చిటికెడు
పసుపు : చిటికెడు
ఉప్పు : తగినంత
నూనె : పావు కప్పు
ముందుగా స్టవ్ వెలిగించి ఒక వెడల్పాటి పాత్రలో లేక పాన్ లో, నాలుగు గ్లాసుల నీళ్లు పోసి మరిగించాలి. నీళ్లు మరుగుతున్నప్పుడు సేమ్యా వేసి 5 నిమిషాలు ఉడకబెట్టుకోవాలి. తర్వాత సేమ్యాను చిల్లుల గిన్నెలో వేసి వెంటనే వెంటనే చల్లటినీళ్లు పోయాలి. ఇందువల్ల సేమ్యా మరింత ఉడికి మెత్తబడకుండా విడివిడిగా అంటుకోకుండా ఉంటుంది. నీరంతా పోయినతర్వాత ఒక పళ్ళెంలో వేసి, తగినంత ఉప్పు, నిమ్మరసం, పసుపు వేసి కలిపి పెట్టాలి. పాన్ లో నూనె వేసి వేడి చేసి పోపుదినుసులు వేసి, వేరుశెనగ గుళ్ళు ఎండుమిర్చి, పచ్చిమిరపకాయలు, కరివేపాకు, చిటికెడు పసుపు వేసి, బాగా వేయించి ఉడికించి పక్కన పెట్టుకున్న సేమ్యాలో వేసి కలియబెట్టాలి. పుల్లపుల్లగా సేమ్యా పులిహార రెడి.