కావలసిన పదార్థాలు
పొడిపొడిగా వండిన అన్నం : 2 కప్పులు
చింతపండు గుజ్జు : అర కప్పు
పచ్చిమిర్చి – 6 నిలువుగా చీల్చుకోవాలి
ఎండుమిర్చి : 2
పోపుదినుసులు : కొద్దిగా
వేరుశెనగ గుళ్ళు : పావుకప్పు వేయించి పొట్టుతీసి ఉంచుకోవాలి
కరివేపాకు : కొద్దిగా
పసుపు
ఉప్పు : రుచికి తగినంత
ఇంగువ : పావుస్పూన్
నూనె : 50 గ్రాములు
ముందుగా చింతపండును నానబెట్టి మెత్తగా పిసికి గుజ్జు తీసుకోవాలి. తరువాత స్టవ్ వెలిగించుకొని బాణలిలో కొద్దిగా నూనె వేసి వేడెక్కినతరువాత చింతపండు గుజ్జులో కొద్దిగా ఉప్పు, పసుపు వేసి దగ్గరపడేవరకు ఉడికించి పక్కనపెట్టుకోవాలి. ఇప్పుడు మరలా బాణలి పెట్టి నూనెవేసి, పోపుదినుసులు, వేరుశెనగగుళ్ళు, పచ్చిమిర్చి, ఎండుమిర్చి, ఇంగువ, అన్నీ వేసి బాగా వేగాక కొంచెం పోపును తీసి పక్కన పెట్టుకోవాలి, మిగిలినపోపులో మగ్గించి పక్కనపెట్టుకున్న చింతపండుగుజ్జును వేసి, 5 నిముషాలు ఉంచి, దించి ఒక వెడల్పాటి పాత్రలో ఉంచుకొన్న అన్నంవేసి దాని మీద పోపుని, చింతపండుతో కలిసిన పోపుని వేసి బాగా కలియబెట్టాలి. అంతా కలిసాక పైన మిగిలిన నూనెను వేసి మరొక్కసారి కలపాలి. అంతే కమ్మని వాసనగల చింతపండు పులిహోర రెడీ. ఇష్టమున్న వారు సన్నగా తురిమిన కొత్తిమీర, క్యారెట్ తురుమును కూడా కలుపుకోవచ్చు. ప్రతి పండుగకు తెలుగువారి ఇళ్ళలో తప్పనిసరిగా చేసే వంట ఇది. ఇంకా ఎక్కువ పరిమాణంలో కావలసినవారు అన్నం మిగిలిన పదార్ధాలు పెంచుకోవచ్చు. అన్నం కొద్దిగా పొడిగా ఉండాలి మెత్తగా ఉంటే పులిహోర ముద్దగా తయారవుతుంది.