బన్నీ ఉత్సవం / Bunny Festival
కర్నూలు జిల్లాలోని హోలగుండ మండలంలో దేవరగట్టు గ్రామంలో వెలసిన మాలమల్లేశ్వరస్వామికి దసరా పండగ సందర్భంగా వైభవంగా బన్నీ ఉత్సవం జరుగుతుంది. దసరా పండుగ సందర్భంగా దేవరగట్టు మాలమల్లేశ్వర స్వామి వారిని దర్శించుకునేందుకు నేరేని తండా, కొత్తపేట మరియు చుట్టు పక్కల గ్రామాలకు చెందిన వేలాది మంది ప్రజలు వస్తారు. దేవరగట్టులోఆరురోజుల పాటు దసరా ఉత్సవాలు ఘనంగా జరుగుతాయి. చివరి రోజు స్వామివారిని దక్కించుకునేందుకు ఇరు గ్రామాల ప్రజలు సాంప్రదాయం పేరుతో కర్రయుద్ధానికి దిగుతారు. ఒకరిని ఒకరు కర్రలతో కొట్టుకొని గాయాల పాలవుతారు
పోలీసులు భద్రతా ఏర్పాట్లు చేస్తున్నప్పటికీ అవి ఫలితాన్ని ఇవ్వటం లేదు. ఇనుప చువ్వలున్న కర్రలతో భక్తులు కొట్టుకుంటారు. గాయపడ్డవారికి మెడికల్ క్యాంపులో చికిత్స అందిస్తారు. ఈ ఉత్సవంలో చుట్టు పక్కల గ్రామాలు ప్రజలు పాల్గొంటారు.
ఆలయం గురించి :
కర్నూలు జిల్లాలోని హోలగుండ మండలంలో దేవరగట్టు గ్రామం ఉంది. ఈ గ్రామంలోని కొండపై 800 అడుగుల ఎత్తులో మాలమల్లేశ్వర స్వామి దేవాలయం ఉంది.
ఇక్కడి పెద్దల కథనం ప్రకారం.....ఇదివరకు ఈ కొండపై మునులు తపస్సు చేసుకునేవారు. ఇదే కొండమీద మణి, మల్లాసుర అనే రాక్షసులు కూడా ఉండేవారు. వీరు మునులను బాధించేవారు. వీరి బాధలు తట్టుకోలేక మునులు పరమేశ్వరుని ప్రార్థిస్తారు. పరమేశ్వరుడు వీరి ప్రార్థన ఆలకించి రాక్షసులను సంహరిస్తాడు. ఈ కొండమీదే మాల మల్లేశ్వరస్వామిగా వెలుస్తాడు. రాక్షసులు మరణించే సమయంలో తమకు ప్రతి సంవత్సరం నరబలి ఏర్పాటు చేయవలసింది కోరతారు. కానీ శివుడు అందుకు ఒప్పుకోక కేవలం గుప్పెడు రక్తతర్పణం జరుగుతుందని వరమిస్తాడు. అప్పటి నుండి ఈ కర్రలతో రక్తం వచ్చేటట్లు కొట్టకునే ఆచారం వచ్చిందంటారు.
విజయదశమి(దసరా) పండుగ నాడు అర్ధరాత్రి పూజారులు మాలమల్లేశ్వరస్వామికి, పార్వతీ దేవికి పూజలు చేస్తారు. తరువాత విగ్రహాలను కొండకిందకు తీసుకువస్తారు. అశ్వవాహనంపై ఆ విగ్రహాలను ఉంచుతారు. కాగడాలతో, పొడవాటి కర్రలతో, మేళతాళాలతో స్వామి వారిని అనుసరిస్తారు. ఈ సందర్భంగా దీపావళి మందుగుండు సామానును పెద్దఎత్తున కాలుస్తారు. దేవతా విగ్రహాలను వేకువజామున ముల్పండ అనే ప్రదేశానికి తెచ్చి పూజలు చేసి తరువాత పడాలకట్ట అనే ప్రదేశానికి చేరుస్తారు. అక్కడ ఆలయ పూజారి గుప్పెడు రక్తతర్పణం సమర్పించటం కోసం తన తొడను కోసుకుని గుప్పెడు రక్తాన్ని అర్పించిన తరువాత ఈ దేవాలయం గురించి మరియు రాబోయే కాలంలో జరిగేవాటిని గురించి జోస్యం చెపుతాడు. తరువాత స్వామివారిని వాహన మీదనుంచి సింహాసనం కట్టమీద కూర్చుండబెట్టి పూజలు చేయటంతో ఈ వింత జాతర ముగుస్తుంది.