ఐరోపా ఖండంలో చిన్న దేశం పోర్చుగల్. దాదాపు కోటి మంది జనాభా మాత్రమే ఉన్నారు. స్పెయిన్, అట్లాంటిక్ మహా సముద్రాలు సరిహద్దులు. దేశంలో మూడు వంతుల్లో ఒక వంతు భూమిలో అడవులే ఉన్నాయి. పోర్చుగల్ రాజధాని లిస్పన్. వీరి కరెన్సీ యూరో. వీరి అధికారిక భాష పోర్చుగీసు. ఈ దేశ వైశాల్యం 92,391 చ.కి.మీటర్లు. దేశ ప్రజలలో 94 శాతం మంది రోమన్ కేధలిక్ శాఖను అనుసరిస్తారు. మిగతా వారు ప్రొటెస్టెంట్లు. ఈ దేశం క్రిస్టియన్ దేశం
ప్రపంచవ్యాప్తంగా ఈ భాషను 23కోట్లమందికి పైగా మాట్లాడుతున్నారని అంచనా. ఈ భాష ఈ దేశానికే కాదు మరో తొమ్మిది దేశాలకూ అధికారిక భాషే. ప్రపంచంలో ఇంగ్లిష్, స్పానిష్ తర్వాత ఎక్కువ మంది మాట్లాడేది ఈ భాషే. తాజా లెక్కల ప్రకారం చూస్తే ఇక్కడ పురుషుల కంటే స్త్రీల ఆయుష్షు ఆరేళ్లు ఎక్కువ.
ఐరోపా ఖండంలో ఉన్న రాతి గుహల్లో అతి అరుదైనది ‘ద బెనాగిల్ కేవ్’. ప్రపంచంలోని తొలి పది అతి చల్లని గుహల్లో ఇదీ ఒకటి. సముద్ర తీరంలో ఉండే ఈ గుహ వింతగా ఉంటుంది. పైన ఆకాశం కనిపించేలా ఓ రంధ్రం ఉండి చుట్టూ గోడలతో మూసుకుని ఉన్నట్టు ఉంటుంది. వాటి మధ్య ఉన్న ఖాళీల నుంచి సముద్రపు అలలు లోపలికి వస్తుంటాయి. దీంతో గుహ లోపల ఉండే ఈ బీచ్లో సరదాగా గడిపేందుకు చాలా మంది వస్తుంటారు. ఇది పోర్చుగల్ దక్షిణ భాగంలో బెనాగిల్ అనే ఓ చిన్న పల్లెలో ఉంది. ఈ వూరి పేరు మీదనే ఈ గుహనూ పిలిచేస్తారు.
పునరుత్పాదక(రెన్యుబుల్) వనరుల నుంచి ఎక్కువగా విద్యుత్ను ఉత్పత్తి చేస్తుందీ దేశం. వీళ్ల అవసరాల్లో 70శాతం విద్యుత్ ఇలాగే ఉత్పత్తి అవుతుంది.
ప్రపంచంలో సర్ఫింగ్కి అతి అనువైన సముద్ర తీరం ఈ దేశానిదేనంటారు. ఏడాది పొడవునా ఇక్కడ అలలు సర్ఫింగ్కి అనుకూలంగా ఉంటాయట. ప్రజా రవాణా కోసం స్ట్రీట్ కార్లను 1890 నుండి వాడేస్తున్నారు. ఇంటికి ఆహ్వానించిన అతిథులకి పూలు, చాక్లెట్లను బహుమతిగా ఇచ్చే సంప్రదాయం వీరికి ఉంది. పదమూడు సంఖ్యను దురదృష్టానికి ప్రతీకగా భావిస్తారు. .
ఈ దేశ రాజధాని లిస్బన్లో 1732లో ఓ పుస్తకాల దుకాణం ప్రారంభించబడింది. దీని పేరు లివ్రారియా బెర్ట్రండ్.ఈ దుకాణం ఇప్పటికీ జనాదరణ పొందుతూనే ఉంది. ప్రపంచంలోనే అతి ప్రాచీన పుస్తకాల దుకాణంగా దీన్ని చెబుతారు.
అతి ప్రాచీన విశ్వవిద్యాలయాల్లో ఇక్కడున్న కోయింబ్రా ఒకటి. 1290వ సంవత్సరంలో దీన్ని స్థాపించారు. ఐరోపా ఖండంలో అతి పొడవైన వంతెన ఇక్కడే ఉంది. దాని పేరు ‘వాస్కోడీగామా బ్రిడ్జ్’. 17కిలోమీటర్ల పొడవుంటుంది.
చరిత్రలో అతి పెద్ద భూకంపంగా చెప్పుకునే ‘గ్రేట్ లిస్బన్ ఎర్త్క్వేక్’ 1755లో ఇక్కడ వచ్చింది. రిక్టరుస్కేలుపై 9 తీవ్రతతో నమోదైన భూకంపం. ఆ వెంటే సునామీ వచ్చింది. ఏకంగా పది వేల మందికి పైగా ప్రాణాలొదిలారు.
ఇక్కడ తృణ ధాన్యాల్ని ఎక్కువగా పండిస్తారు. ఇవే కాకుండా బంగాళాదుంపలు, ద్రాక్ష, బాదం,ఆలివ్, టమాటాలనూ సాగుచేస్తారు. గొర్రెలు, బాతులను పెంచుతారు. చేపలు, కోళ్ల పరిశ్రమ, పాడి పశువుల పెంపకం కలదు. ఇతర దేశాలకు టామాటా పేస్ట్ని ఎక్కువగా ఎగుమతి చేసే దేశం ఇదే.
ఇనుప ఖనిజం, రాగి, జింక్, టంగ్ స్టన్, వెండి, బంగారం, యురేనియం, జిప్సం, సాల్ట్ సహజ సంపదలు.