header

Urinary Infections

మూత్ర నాళ ఇన్‌ఫెక్షన్లు డా. కె. శుబ్రహ్మణ్యం, సీనియర్ యురాలజిస్ట్, అపోలో హాస్పటల్స్, జూబ్లిహిల్స్, హైదరాబాద్

మూత్రం పోయటానికి వెళ్లాలంటే భయం. మూత్రం పోస్తుంటే భరించలేనంత మంట. ఒకసారి మూత్ర విసర్జన చేశాక మళ్లీ మళ్లీ వెళ్లాలని అనిపించటం. ఇలా మూత్రనాళ ఇన్‌ఫెక్షన్ల బారినపడ్డవారి బాధలు అన్నీ ఇన్నీ కావు. అసలే పురుషుల కన్నా స్త్రీలకు ఈ మూత్ర నాళ ఇన్‌ఫెక్షన్ల బెడద ఎక్కువనుకుంటే.. ఇవి ఎండకాలంలో 10-20% పెరుగుతుంటాయి కూడా. వేసవిలో తలెత్తే కిడ్నీ సమస్యల్లో ప్రధానంగా చెప్పుకోవాల్సిందీ వీటి గురించే. సాధారణంగా మూత్ర మార్గం ద్వారా బయటినుంచి మూత్రాశయంలోకి ప్రవేశించే బ్యాక్టీరియా- మూత్రం పోసినపుడు బయటకు కొట్టుకొచ్చేస్తుంటుంది. అయితే ఎండకాలంలో చెమట మూలంగా ఒంట్లో నీరు తగ్గటం, దీనికి తోడు తగినంత నీరు తాగకపోవటం, చాలాసేపటి వరకూ మూత్ర విసర్జన చేయకపోవటం మూలంగా బ్యాక్టీరియా వృద్ధి చెంది ఇన్‌ఫెక్షన్లకు దారితీస్తుంది. అప్పటికే తరచుగా మూత్ర ఇన్‌ఫెక్షన్లతో బాధపడేవారికి ఎండకాలంలో ఇది మరింత ఎక్కువయ్యే అవకాశముంది.
ఏం చేయాలి?
--నీరు తగినంతగా తాగటం ప్రధానం. దీంతో మూత్రం ఎక్కువగా తయారై బ్యాక్టీరియా ఏదైనా ఉంటే బయటకు వచ్చేస్తుంది. మనలో చాలామంది పనుల్లో పడిపోయి నీరు తాగటం మరచిపోతుంటారు. దాహం వేసేంతవరకూ నీటి విషయమే గుర్తుకురాదు. నిజానికి మనకు దాహం వేయటానికన్నా ముందే ఒంట్లో నీటిశాతం తగ్గిపోతుంది. అందువల్ల ఎండకాలంలో తరచుగా నీటితో పాటు మజ్జిగ, పండ్ల రసాల వంటివి తీసుకోవటం మంచిది.
--మహిళలకు జననాంగ శుభ్రత కూడా చాలా కీలకం. ముఖ్యంగా మల విసర్జన అనంతరం కడుక్కునే సమయంలో ముందు నుంచి వెనక్కి కడుక్కోవాలి. వెనక నుంచి ముందుకు కడుక్కుంటే మలంలోని బ్యాక్టీరియా మూత్రమార్గం దగ్గరకు చేరుకుని లోపలికి ప్రవేశించే అవకాశం ఎక్కువవుతుంది.
--మూత్ర విసర్జన సమయంలో మంట, నొప్పి, ఎక్కువసార్లు మూత్రానికి వెళ్లాల్సి వస్తుండటం వంటి లక్షణాలు కనబడితే తాత్సారం చేయకుండా వెంటనే డాక్టర్‌ను సంప్రదించి చికిత్స తీసుకోవాలి. దీంతో సమస్య ముదరకుండా చూసుకోవచ్చు. ముఖ్యంగా తరచుగా మూత్రనాళ ఇన్‌ఫెక్షన్లు తలెత్తేవారు వేసవిలో మరింత జాగ్రత్తగా ఉండటం అవసరం.
చికిత్స ఏంటి?
మూత్రనాళ ఇన్‌ఫెక్షన్‌ను అనుమానిస్తే డాక్టర్లు సాధారణ మూత్ర పరీక్ష, కల్చర్‌ పరీక్ష చేయిస్తారు. కల్చర్‌ ఫలితం రావటానికి 48 గంటలు పడుతుంది కాబట్టి ఆ లోపే యాంటీబయోటిక్‌ మందు ఆరంభిస్తారు. అనంతరం కల్చర్‌ పరీక్ష ఫలితాన్ని బట్టి అవసరమైతే మందు మారుస్తారు. ఇన్‌ఫెక్షన్‌ మరీ తీవ్రమై, డీహైడ్రేషన్‌ ఎక్కువగా ఉంటే సెలైన్‌.. యాంటీబయోటిక్‌ సూది మందులు ఇవ్వాల్సి ఉంటుంది.