పంచనారసింహ క్షేత్రం......యాదగిరి
ఉత్తరభారతదేశంలో నారసింహ క్షేత్రాలు చాలాతక్కువ. దక్షిణాదిలో ....అదీ ఆంధ్రప్రదేశ్ లో ఎక్కువగా ఉన్నాయి. దేశంలోనే ఏకైక నవనారసింహక్షేత్రం అహోబిలం. ఆ తరువాత అంతప్రాముఖ్యత ఉన్న క్షేత్రం యాదగిరిగుట్ట. ఎందుకంటే ఇది పంచనారసింహక్షేత్రం. ఈ క్షేత్రం తెలంగాణా రాష్ట్రంలో యాదగిరిలో ఉన్నది.
సృష్టికి పూర్వం శ్రీ మహావిష్ణువు నరసింహరూపంలోనే బ్రహ్మకు దర్శనం ఇచ్చాడట.‘ఉగ్రం వీరం మహావిష్ణుం జ్వంతం సర్వతోముఖం నృసింహం భీషణం భద్రం మృత్యోర్ముత్యుం నమామ్యహం’అని మంత్రోపదేశం చేశారట. దీనివల్లే బ్రహ్మకు వేద దర్శనమై ఆ తరువాత సృష్టి మొదలు పెట్టాడట. అంతటి ప్రాముఖ్యం ఉన్న అవతారం నృసింహావతారం. అలాంటి నారసింహుడు వెలసిన పవిత్రక్షేత్రం యాదగిరి.
యాదర్షికోరిక మీద...
యాదగిరిగుట్టకు సంబంధించిన కథకు మూలం వాల్మీకి రామాయణంలోని విభాండక రుషి, అతడి పుత్రుడైన రుష్యృశృంగుడి కుమారుడు యాదరుషి. అతడినే యాదర్షి అంటారు. చిన్నప్పట్నుంచి నరసింహుడి భక్తుడైన అతడికి ఆస్వామిని దర్శించాలని బలమైన కోరిక ఉండేదట. నరసింహుడ్ని అన్వేషించడానికి అడవులు, కొండలు, కోనలు తిరిగాడు. నరసింహుని దర్శనం కాలేదు. అలా సంచరిస్తున్న యాదర్షి ఒకరోజు ఇప్పుడున్న యాదగిరి అరణ్య ప్రాంతానికి చేరుకుని అలసిపోయి ఒక రావి చెట్టు క్రింద పడుకున్నాడు. అపుడు కలలో ఆంజనేయ స్వామి కనిపించి ‘ నీ పట్టుదల నాకు నచ్చింది. నీకు తోడుగా నేనుంటాను. కఠినంగా తపస్సుచేస్తే స్వామి తప్పక ప్రత్యక్షమవుతాడు ’ అని చెప్పాడట. నిద్రలేచిన యాదర్షి అక్కడే తపస్సు మొదలు పెట్టాడు. కొన్నాళ్ళకు ఉగ్రనరసింహుడు ప్రతక్షమయ్యాడట. ఆ తేజస్సును చూడలేక శాంతస్వరూపంతో కనిపించమని కోరాడట యాదర్షి . అప్పుడు లక్ష్మీ సమేతుడై దర్శనమిచ్చి ‘‘ఏమికావాలో కోరుకో’’ అని అడిగాడు స్వామి.
‘‘నీ దర్శనం కోసం ఇంతఘోర తపస్సు సామాన్యులు చేయలేరు. అందుకే నువ్వు శాంతరూపంతోనే ఇక్కడ కొలువై ఉండిపో’’ అని కోరాడట. అప్పుడు కొండశిఖరం మీద స్వామి ఆవిర్భవించాడు. కొన్నాళ్ళ తరువాత యాదర్షికి మరో కోరిక కలిగింది. ‘‘స్వామిని ఒకే రూపంలో చూసాను. వేర్వేరు రూపాల్లో చూడలేక పోయానే’’ అనుకొని మళ్ళీ ఈ ప్రాంతానికి వచ్చి తపస్సు మొదలు పెట్టాడు. కొన్నాళ్లకు స్వామి ప్రత్యక్షమయ్యాడు.
‘‘ నారూపాన్నీ నువ్వు చూడలేవు అయినా నీకోసం మూడు రూపాలు చూపిస్తాను’’ అని జ్వాల, యోగానంద, గండభేరుండ నారసింహ రూపాలలో దర్శనమిచ్చాడు. జ్వాలా నరసింహుడు సర్పరూపంలో వుంటాడు. యోగానందుడు అర్చా విగ్రహరూపంలో వుంటాడు. గండభేరుండ నరసింహుడు కొండబిలంలో కొలువై ఉంటాడు. తరువాత యాదర్షి..... తనను స్వామిలో ఐక్యం చేసుకోమని కోరడంతో అలాగే చేసుకున్నాడట స్వామి. ఆ యాదర్షి పేరుమీద ఇది యాదగిరి గుట్ట అయింది.
కలియుగంలో.....
ఆ తరువాత దాని గురించి ఎవరికి తెలియలేదు. కలియుగంలో ఒక రోజు రాత్రి గ్రామాధికారికి స్వామి కలలో కనిపించి తాను ఈ ప్రాంతంలోనే నాలుగు రూపాల్లో ఉన్నానని గుర్తు చెప్పాడట. గ్రామాధికారి వెళ్ళి రేఖామాత్రంగా ఉన్న స్వామి రూపాలను గుహనూ, ఆంజనేయుణ్ని కనుగొన్నాడట. అప్పట్నుంచి స్వామికి పూజాధికాలు మొదయ్యాయి. గర్భగుడిలో ఎదురుగా ఉండే స్వామి జ్వాలా నరసింహుడు. మరికాస్త లోపల యోగ ముద్రలో యోగానందస్వామి, లక్ష్మీనరసింహ స్వాములను చూడవచ్చు.
గర్భాలయం నుండి బయటకు వస్తే మెట్లకు ఎడమ ప్రక్కన క్షేత్రపాలకుడైన హనుమంతుడి గుడి ఉంది. హనుమంతుడి విగ్రహానికి క్రిందన ఉన్న పెద్ద రాతిచీలికలో గండభేరుండ నరసింహుని స్వయంభువు రూపం కనిసిస్తుంది. ఆంజనేయ స్వామిని దర్శించుకున్నాక బయట ఎడమ వైపు మెట్లు దిగితే పుష్కరిణి, కుడివైపు కొన్ని మెట్లు దిగితే పర్వతవర్ధిని,సమేత రామలింగేశ్వరుని ఆలయం కనిపిస్తాయి.
సత్యనారాయణ వ్రతాలు
ఈ క్షేత్రంలో ‘ప్రదక్షణ మొక్కు’ ప్రధానమైంది. దీని వలన మానసిక, శారీరక, ఆర్ధిక బాధనుంచి విముక్తి కలుగుతుందని భక్తుల నమ్మకం. మండలం (41 రోజులు) అర్ధమండలం, 11 రోజుల ప్రదక్షిణ మొక్కు మొక్కుకుంటారు భక్తులు. నిత్యం గర్భాలయానికి రెండుసార్లు, ఆంజనేయ స్వామికి 16 సార్లు ప్రదక్షణు చేస్తారు. ఈ మొక్కు తీర్చుకునే దశలో స్వామి కలలోనే తమకు శస్త్రచికిత్సు చేసి, శారీరక బాధనుంచి విముక్తి చేస్తాడని నమ్ముతారు.
సత్యనారాయణస్వామి వ్రతాలకు అన్నవరం తరువాత అంత ప్రసిద్ధి చెందిన క్షేత్రం యాదగిరి గుట్ట. రోజులో నాలుగుసార్లు ఈ వ్రతాలు జరుగుతాయి. ఏటా ఫాల్గుణ మాసంలో 11 రోజుల పాటు నారసింహుని బ్రహ్మోత్సవాలు జరుగుతాయి. ఈ ఉత్సవాల్లో ఎనిమిది రోజు పాటు సాంస్కృతిక కార్యక్రమాలు కూడా నిర్వహిస్తారు.
ఎలా వెళ్లాలి ?.....
యాదగిరి గుట్ట.... హైదరాబాదునుండి 60 కి.మీ దూరంలో ఉంది. ఇక్కడికి చేరుకోవడాని ఆర్‌టిసి బస్సులున్నాయి. హైదరాబాదు-వరంగల్‌ జాతీయ రహదారిలో రాయగిరి క్రాస్‌రోడ్డునుండి వెళ్లవచ్చు. రైలు మార్గంలో భువనగిరి, రాయగిరి , ఆలేరు రైల్వేస్టేషన్‌లో దిగి స్వామి వారి సన్నిధికి చేరుకోవచ్చు . ఈ క్షేత్రాన్ని దృష్టిలో పెట్టుకుని హైదరాబాదునుండి సరికొత్తగా రూ.350 కోట్లతో ‘యాదగిరి రోడ్డు’ పేరిట 8 లైన్ల రహదారి నిర్మాణ పనులు చేపట్టారు.